文章分類: 生活點滴 (同一天空下)

我的女兒，恭喜妳！

candy1765 — Fri, 27 Nov 2009 02:32:40 +0800

24/9學校的陸運會
每年陸運會，女兒都會參加，亦取得好成績(包括銀牌、銅牌)，唯獨欠金牌，
不過，今年她終於願望達成，在60m賽跑中取得她渴望已久的金牌，在接力賽中亦取得銅牌。

阿女，恭喜妳！！

嚇親人

candy1765 — Thu, 24 Sep 2009 02:43:11 +0800

食月餅，我最愛奇華，哈哈~奇華餅家應該揾我做代言人(講笑)。Elaine知我鐘意食月餅，所以送咗兩盒月餅比我，仲要係奇華。另外，小巴佬又送咗一張美心月餅咭。不過，中秋節都未到，我已經喺6日內食哂1盒月餅，中咗月餅毒~哈哈......

＊緣份＊

candy1765 — Tue, 15 Sep 2009 02:31:50 +0800

今天重遇一位太太，她的兒子和我的兒子都是3歲。

3年前，我和她在同一間醫院，在相同的日子剖腹誕子，我的兒子比她的兒子大兩小時。因為那天早上我被安排首位入手術室，她緊隨我，所以除了手術室的醫生和護士外，她是第一位看到我兒子的人，比我家人還要早。

最近她搬進我住的區內，小孩子倆巧合地入讀同一間幼稚園，不同的只是分別就讀上、下午班而已。

這是緣份吧！

細佬上學去

candy1765 — Fri, 11 Sep 2009 10:06:46 +0800

新生適應週完結，31/8 開始，媽咪唔可以再陪細佬上堂，頭3日都唔喊，第4日開始先醒起媽咪唔係身邊，一返到學校門口就勁喊，仲要喊到嘔，每日用各種不同招數，氹又唔得，鬧又唔掂，真係比佢激死，想當年，家姐比細佬堅强得多，從未試過返學喊(除咗幼稚園畢業，唔捨得而喪喊)。

3日前，終於比我諗到個好方法，就係返到學校門口打電話比Daddy同佢傾吓計，哈~呢個方法真係一個講晒“掂”

「喊」呢個問題解決咗，另一個問題出現......「坐唔定」，丘老師每晚一個電話向我報告佢喺課堂嘅情況，好彩，最近佢都有明顯嘅改善，希望佢繼續努力!!

~多謝丘老師，因為佢每晚用私人時間同我溝通~

流心芒果布甸 (附食譜)

candy1765 — Sun, 30 Aug 2009 04:59:53 +0800

第一次自製流心芒果布甸，好味過普通ge芒果布甸

流心餡材料:
芒果切粒 450g *份量可隨意加減
糖 100g *份量可隨意加減
檸檬1個
流心餡製作:
芒果粒450g + 檸檬汁 + 糖 (分次落並試味) 用攪拌機打成茸,
倒入盒放冰箱至結成冰, 後切方丁放回冰箱待用…

布甸材料:
芒果啫喱粉 45g
魚膠粉  半湯匙
花奶  200ml
熱水  200ml
布甸製作:
1)芒果啫喱粉 +魚膠粉用200ml 熱水攪溶, 待涼後 + 花奶 + 芒果茸120g 拌勻..
2)將布甸醬倒入小杯半滿, 放入一粒流心餡方丁(要放正中), 再倒布甸醬至滿,
  放入雪櫃雪凍

好緊張~

candy1765 — Mon, 24 Aug 2009 02:35:56 +0800

過多幾個鐘，細佬就返學喇，雖然呢個星期係新生適應週，兼且家長陪上堂，但係我嘅心情依然好緊張~

觀塘少年警訊35週年＆迎新同樂日

candy1765 — Thu, 20 Aug 2009 05:57:10 +0800

8月19日，我同兩個豆釘參加觀塘少年警訊35週年＆迎新同樂日，活動內容好豐富：有禁毒講座、攤位遊戲、歌唱表演、魔術表演......表演嘉賓有河國榮同埋陳美詩。亞女話今次呢個同樂日嘅攤位遊戲比上個禮拜《兒童快報》辦嘅好玩好多 ~ "咁就梗係啦，少訊會員最低年齡10歲，JPC當然會設計d啱你哋年齡玩嘅遊戲啦"

阿仔，你好肚餓咩？

candy1765 — Sun, 16 Aug 2009 04:54:34 +0800

尋日帶佢哋兩個去金域假日酒店，參加由大新銀行&兒童快報舉辦嘅Fun Day攤位遊戲。玩第一個攤位遊戲就差d俾阿仔嚇死，個遊戲係用泥膠整小動物，唔知佢係唔係好肚餓，定係見到d泥膠顏色靚以為係糖，竟然擺入口食......我即刻幫佢攞番出嚟。"阿仔，知道d泥膠難食咧，睇你下次仲敢唔敢"

囝囝生日

candy1765 — Sun, 09 Aug 2009 05:31:28 +0800

昨天是囝囝的3歲生日，又大一歲了。

小朋友過生日就最開心，有禮物收，有利是收，又有生日旦糕......

3歲生日，旦糕3磅重......明年......？？@@

不過，那個旦糕確實超正

紀念日

candy1765 — Tue, 04 Aug 2009 04:49:08 +0800

聽日係會考放榜日，當然唔關我事啦，其實係我同佢相識嘅紀念日，結婚紀念日佢就未必記得，但係相識紀念日佢就一定記得......希望颱風小姐你快d走，如果唔係我哋點出去慶祝呀！

病情......很差

candy1765 — Tue, 21 Jul 2009 03:38:40 +0800

尋日去醫院覆診，抽血結果顯示......很差，醫生話咁嘅情況唔係任何人都頂得住，佢勸我轉用其他治療方法，飲碘水或者做手術，我向醫生講出我嘅憂慮，佢都好明白，佢亦唯有加重藥量，再千叮萬囑我，如果覺得勁唔舒服，就要改期提早覆診或者去急症室......我都知道再差落去會有好大影响，長期食藥亦會對肝唔好，但係冇辦法......

囝囝的第一次

candy1765 — Sat, 18 Jul 2009 04:11:09 +0800

尋日帶咗對仔女去泳池游水，自從細佬出世之後，家姐好耐都冇去游水，所以佢今日勁開心。細佬由我同家姐嘅帶領下，進行咗佢人生第一次嘅下水禮。你兩個就好啦，難為你媽咪，有得落水冇得游，不過冇所謂啦，最緊要你哋開心。

MJ一路好走

candy1765 — Fri, 10 Jul 2009 05:20:25 +0800

那晚看Michael Jackson追思會，一邊看，一邊期待，
期待他突然從棺木跳出來，再向大家說Just a Joke！最後當然沒有吧！

Michael Jackson一路好走

為自己嘅夢想和興趣而努力

candy1765 — Fri, 03 Jul 2009 03:46:41 +0800

每個人都有自己嘅夢想、有自己嘅興趣，每個人都會為自己嘅夢想和興趣而努力。而我自己，最想學番放低多年嘅電子琴，最好可以學埋結他......我都要為自己嘅興趣努力~

一個夢

candy1765 — Wed, 01 Jul 2009 03:55:13 +0800

前晚做夢，夢境裡媽媽跟我們幾兄弟姊妹說：「爸爸怪責你們很久沒和他吃飯，他很生氣。」於是，我們馬上換衣服約爸爸吃飯，當我們開門準備外出，見爸爸站在門外，看得出他的樣子應該還在生氣，我跟他說：「爸，我們打算去找你一起吃飯。」他只是點點頭。跟着大哥對爸爸說話，但是爸爸不理睬他。

雖然夢醒了，但是印象深刻。是不是天國的爸爸希望我們多點回家吃飯？

昨晚剛巧丈夫要開夜班，我就和兩個孩子回娘家吃飯，吃飯前上了主一香給爸爸，還和一家人分享爸爸報給我的夢。

哈哈~細妹，爸爸不只報夢給你一個啊！哈哈~

爸爸，其實我好開心可以係夢中見到你。